若是台語是我少年時
Nā-sī Tâi-gí sī guá siàu-liân sî
我看的是窗仔外
Guá khuànn ê sī thang-á-guā
我聽的是鳥仔聲
Guá thiann ê sī tsiáu-á-siann
我畫的是尪仔
Guá uē ê sī ang-á
佇烏枋寫字畫圖
tī oo-pang siá-jī uē-tôo
提的是白墨佮烏枋拭仔
The̍h ê sī pe̍h-ba̍k kah oo-pang-tshit-á
若是台語是我少年時
Nā-sī Tâi-gí sī guá siàu-liân sî
雨是用落的
hōo sī iōng lo̍h ê
雨傘是用攑的
hōo-suànn sī iōng gia̍h ê
日頭是用曝的
Ji̍t-thâu sī iōng pha̍k ê
虹的色水我會講
Khīng ê sik-tsuí guá ē kóng
紅色
Âng-sik
柑仔色
Kam-á-sik
黃色
N̂g-sik
草仔色
Tsháu-á-sik
藍色
Nâ-sik
紺色
Khóng-sik
茄仔色
Kiô-á-sik
我會講天開矣
Guá ē kóng thinn-khui ah
若是台語是我少年時
Nā-sī Tâi-gí sī guá siàu-liân sî
我會唸
Guá ē liām
「去做，抑是莫去做——彼是一个問題。」
"Khì tsò, iah-sī mài khì tsò——he sī tsi̍t ê būn-tê."
《異鄉人》
Ī-hiong-lâng
《百年寂寞》
Pah-nî siok-bo̍k
《佇烏麥仔田的捕手》
Tī oo-be̍h-á-tshân ê póo-tshiú
《檢采佇冬夜，一个旅客》
Kiám-tshái tī tang-iā, tsi̍t ê lú-kheh
若是台語是我少年時
Nā-sī Tâi-gí sī guá siàu-liân sî
我會讀著
Guá ē tha̍k-tio̍h
「為著消滅遮的民族，按搶奪[亻因]的記持開始。破壞[亻因]的冊、[亻因]的文化、[亻因]的歷史。
"Uī-tio̍h siau-bia̍t tsia ê bîn-tso̍k, àn tshiúnn-tua̍t in ê kì-tî khai-sí. Phò-hāi in ê tsheh, in ê bûn-huà, in ê li̍k-sú.
⋯⋯
人民沓沓仔開始袂記得[亻因]是啥人、[亻因]以前是啥人。
Lîn-bîn ta̍uh-ta̍uh-á khai-sí bē-kì-lit in sī siáng, in í-tsîng sī siáng.
⋯⋯
——啊語言咧？——[亻因]是按怎愛消滅咱的語言？這干焦就是一个早慢攏會自然死去的民間故事爾爾。」
——Ah gí-giân--leh? ——In sī-án-tsuánn ài siau-bia̍t lán ê gí-giân? Tse kan-na tio̍h sī tsi̍t ê tsá-bān lóng ē sí--khì ê bîn-kan kòo-sū niā-niā."
若是
Nā-sī
若是
Nā-sī
但是台語毋是我少年時
Tān-sī Tâi-gí m̄ sī guá siàu-liân sî
是我希望莫死去的
Sī guá hi-bāng mài sí--khì ê
是我希望
Sī guá hi-bāng
毋但干焦是民間故事
M̄-nā kan-na sī bîn-kan kòo-sū
的 我
Ê guá
【註解】tsù-kái
尪仔 ang-á：人偶、娃娃
烏枋 oo-pang：黑板
白墨 pe̍h-ba̍k：粉筆，唸起來跟「白目」一樣。
烏枋拭仔 oo-pang-tshit-á：黑板擦
色水sik-tsuí：顏色
天開 thinn-khui：放晴
翻譯：
莎士比亞《哈姆雷特》："To be, or not to be——That is the question."
《百年孤寂》：Cien años de soledad
《麥田捕手》：The Catcher in the Rye
《如果在冬夜，一個旅人》：Se una notte d'inverno un viaggiatore
米蘭．昆德拉《笑忘書》："Pour liquider les peuples, on commence par leur enlever la mémoire. On détruit leurs livres, leur culture, leur histoire. ... le peuple commence lentement à oublier ce qu’il est et ce qu’il était. ... —— Et la langue ? —— Pourquoi nous l’enlèverait-on ? Ce ne sera plus qu’un folklore qui mourra tôt ou tard de mort naturelle."
No comments:
Post a Comment