拆箬日月
Thiah-ha̍h ji̍t-gue̍h
北爿是日盤
Pak-pîng sī ji̍t-puânn
南爿是月光
Lâm-pîng sī gua̍t-kng
日盤和月光敆作一窟潭
Ji̍t-puânn hām gua̍t-kng kap-tsoh tsi̍t khut thâm
燈火倒反照佇水面
Ting-hué tò-píng-tsiò tī tsuí-bīn
綴流水起起落落
Tuè lâu-tsuí khí-khí lo̍h-lo̍h
咱佇水邊揣一个向望
Lán tī tsuí pinn tshuē tsi̍t ê ǹg-bāng
輕聲叫醒日頭
Khin-siann kiò-tshínn ji̍t-thâu
碼頭，朝霧坱蓬蓬
Bé-thâu, tiau-bū ing-phōng-phōng
薄薄的雺霧是笑藍
Po̍h-po̍h ê bông-bū sī tshiò-nâ
親像行入雲中的仙境
Tshin-tshiūnn kiânn-ji̍p hûn tiong ê sian-kíng
天，沓沓仔拆箬
Thinn, ta̍uh-ta̍uh-á thiah-ha̍h
日出的金黃對山的彼頭精神
Ji̍t-tshut ê kim-n̂g tuì suann ê he-thâu tsing-sîn
金映映的笑容愈來愈顯目
Kim-iànn-iànn ê tshiàu-iông jú lâi jú hiánn-ba̍k
佇日佮月的湖面
Tī ji̍t kap gue̍h ê ôo-bīn
閃閃爍爍
Siám-siám-sih-sih
又閣是清彩的一工
Iū-koh sī tshing-tshái ê tsi̍t kang
——日月潭朝霧碼頭看日出
——Ji̍t-gua̍t-thâm Tiau-bū bé-thâu khuànn ji̍t-tshut
2026.5.18
《臺江臺語文學59期》
No comments:
Post a Comment